يا حلاوة الأهلي و هو على المنصة

لولا التعب و العيا اللي انا فيه كنت كتبت للصبح عن الاهلي اللي اثبت انه مش دولة و بس لا و قارة و كوكب كمان

اعذروني لاني بحد تعبانة مع وعد بالكتابة عن الانجاز و الظلم في اول فرصة الحرارة تنزل فيها عن 40

الوزير الخرفان و كلامه الأهبل

من امتى و الأخ فاروق بقى متي مش عارفة

من امتى و هو صاحب رأي يعتد بيه اصلا ...برضه مش عارفة

للأخ فاروق اللي بيقول ان اركان الإسلام 4 و ووفر على الناس واحد(و اهو كله تخيضات و لا موسم البواقي و الفضل)ارحمنا

للأخ فاروق اللي شاي ان شعر البنات بيخليهم زي الورود

للأخ فاروق.....................طظ

فيك و في اللي كان السبب فيك

النادي الأهلي بطل أفريقيا تاني و تالت و رابع و خامس

مش عارفة كالعادة أبدأ منين
من جوزيه الساحر
ولا ابو تريكة الفنان
ولا فلافيو المتحدي
ولا قناوي اللي اثبت لي انه شديد صح
ولا الصفاقسي العنيف المغرور
كانت ليلة من العمر بجد
كانت احلى هدية للغلابة اللي اعصابهم نشفت 92 دقيقة
كانت احلى هدية لحبيبنا كلنا و فقيدنا كلنا عبد الوهاب اللي بأعتبره انه كان اللاعب نمرة 12 في الفريق
ربنا يخليك يا أهلي ياللي وريتنا لمحة نور و فرحة في دنيا ضلمة و كحل

بنات وسط البلد

انا قلت استنى شوية لما الدنيا تهدى كده و الناس تفوق علشان نتكلم في الموضوع ده
ايه اللي بيحصل في بلدنا
كل يوم بتتعرض البنات في بلدنا لمليون نوع اضطهاد
من اول هي ليه اصلا بتطلع من بيتها
السؤال ده انا اتسألته من واحد تعليقا على اللي حصل
"مش لو كانوا قعدوا في بيوتهم ماكانش ده حصل"
قلبنا الضحية لجاني
بدأنا باللي تلبس عريان هي اللي جابته لنفسها
مرورا على اللي مش محجبة هي اللي بتجيبه لنفسها
وصولا للي بتنزل من بيتها هي اللي بتجيبه برضه لنفسها
يااااااااااااااه
كل دول بنات ولاد ستين في سبعين نازلين الشارع علشان يجيبوه لنفسهم
انا عندي حل حلو
احنا اللي يشوف واحدة ماشية في الشارع يضربها بالنار و يخلص البلد من عارها
يا راجل....ما هي اللي جابته لنفسها

تخاريف رياضية

قامت الدنيا و ما قعدتش على جوزيه
الخواجة الاجنبي العميل اللي جاي من بلدهم علشان يشتمنا و يشاور لنا بطول دراعه
يعني لو كان بصباعه كانت هانت
لكن توصل لدراعه كلها
لازم نقطعهاله
يا اخي بلا و كسة
ده مش جهل و بس
لا و هطل كمان
انا هنا مش بدافع عن حركة اي عيل بيشوف مسلسل اجنبي و مش فاهمه و اخره يقرا الترجمة ان كان بيعرف يقرا كان عرف انها معناها القوة ضد الظلم الطاغي
و مش هسرد تاريخ مواقف مماثلة
بس هسأل الأخوة المحموقين قوي قوي قوي
فينكم من اللي بيحصل لاتنين لاعيبة مصريين ضاع مستقبلهم من تحت راس حكم قذر افترى طول 90 دقيقة و ما كفاهوش قرر انه لازم يربيهم علشان يتعلموا يتضربوا على قفاهم و هما ساكتين
هسأل المحموقين عن اتحاد واكل شارب نايم قايم في حضننا و هو اول من بيضربنا في ضهرنا و يرفع تقارير مضروبة للفيفا ضد لاعيبة غلابة و مظلومة
بيرفع تقاريره بالفاكس و احنا اللي بندفع تمن فاكساتهم من جيبنا يا ..............محموقين

مالك يا بلد....يا عيني عليكي يا بلد

مالك يا بلد
سؤال بقي على كل لسان
مع ان العيب مش في البلد
البلد هي البلد
لا زاد فيها دراع و لا نقص منها باع
العيب فينا
ايه اللي حصل لنا يا ولاد بلدي
كل ما ابص الاقينا شابطين في بعض
كل من اختلف كفر التاني
بقت موضة و ماشية في.........البني ادمين
بعد ما كنا كلنا مصريين
بقينا مسلمين و مسيحيين
و كله بيكفر بعضه
ناخدهم واحد واحد
المسلمين بقوا سنة وشيعة
السنة بقوا مليون حاجة في بعض
اللي يقولك سلفي و اللي يقولك وهابي و اللي يقولك اشاعرة و ماتريدية
و كله بيكفر بعضه
الشيعة كمان بقوا مليون حاجة
زيدية و جعفرية و علوية و اثنى عشرية
و كله بيكفر بعضه
حتى المسيحيين هما كمان
كل ملة بقت بتطعن في دين التانية
وكله بيكفر بعضه
الأغرب و الأعجب انه من دقنه و افتله
كلنا بنقطع في بعض
و اللي بره بيتفرجوا و اخر انبساط
ما احنا بنعملهم شغلهم و اجدع منهم كمان
امال...هو مش احنا احسن منهم برضه
يا عيني عليكي يا بلد

رحنا و جينا

بالسلامة او مش بالسلامة

رحنا و جينا

و الحال واحد

الوجع واحد

الهم و الذل و الهوان واحد

ايه الجديد

رحنا و جينا

الكلمات دي كانت في بالي و انا راجعة من المصيف

شفتلكوا هناك ناس عايشة و مش عايشة

ناس فاكراها فل الفل

ناس فاضية و رايقة

ناس بتنام للعصر و يومها بيبدأ الساعة 10 بالليل

ناس اخرها العربية الاخر موديل و البت الحلوة ( في بعض الحالات الواد الحلو) ...يعني من الاخر ولا في دماغها

تسأل الواحد منهم نفسك في ايه اكتر حاجة تلاقي عينه بتجري على اول شقرا معدية

تسأل الواحدة نفس السؤال تلاقي عينها رايحة ورا كومة عضل واضح قوي انها من غير مخ واقف يفرد دراعاته في الهوا و داهن نفسه فازلين و لا ماعرف ايه علشان يلمع

هو فيه ايه؟؟؟؟؟؟؟؟؟

the first day اليوم الأول

النهارده اول يوم اتجنن فيه و ابدأ بلوج

مش عارفة اعمله عربي و لا اعمله انجليزي

النهارده اول يوم اتجنن فيه و اقول اللي في نفسي

مش عارفة افتح على الرابع و لا الم الدور

النهارده اول يوم اتجنن فيه و اخرج من الشرنقة

انا بنت مصرية

عندية و قوية

قلبي اخف من نسمة الصيف و اقوى من اي نوة

انا بنت مصرية و كل اللي حوليا بيشدني لورا ميت سنة

لكن انا نويت و قررت
يا اكون انا زي ما انا يا بلاش مني انا

من هنا و من النهارده هبدأ

احاول اقول يومي و اللي بيحصل حوليا

هحاول اقول رأيي في زمنرأي البنت فيه عيبة

هحاول اكون .....انا