قال بيقولك هيما راجع

أخر الأخبار بتقول بتقول أن اللاعيب الموهوب العبقري المؤدب الرائع السوي اللي عمره عمره عمره ما عمل مشاكل مع حد راجع

هيما الغلبان المسكين اللي الناس كانت بتديله على قفاه فيقولوهم كمااااان راجع

هيما اللي عمره ما شبط في مدرب و لا ظبط واحدة في معسكر ولا اتخانق مع زميل و لا عمل محضر لمدير كرة راجع

هيما راجع يا رجالة

و لا عزاء للرجالة

الخائن و الشهيد

مش عارفة ليه غصب عني مقارنة ظالمة طلعت في بالي

مقارنة بين مهندس شاب طموح متفائل يسعى للسفر للخارج لتطوير مهاراته و قدراته

و لما جأته الفرصة

ضحى بحياته في سبيل أنقاذ روح أخري

و أن لم تكن من عرقه

و ان لم تكن من دمه

و ان م تكن من دينه

أما الأخ فبرضه مهندس شاب طموح يسعى للسفر للخارج و لكن ليس لتطوير نفسه بل ليعرض أن يكون جسوسا على بلده

على عرقه

على دمه

على دينه

مش بقولكم مقارنة ظالمة

سامحني يا وليد و ليرحمك الله برحمته الواسعة و يلهم أهلك الصبر و يطرخ الخير في أبنك قادر يا كريم

عالم جواسيس جواسيس جواسيس

طب بالذمة مش مسخرة أن مهندس نووي قد الدنيا يروح لحد سفارة أسرائيل و يقولهم خدوني

طب بالذمة مش حاجة تقرف لما مهندس شاب توصل بيه انهم و على جهاز كشف الكذب يقولهم بكره مصر و يطلع صادق

في ايه

هل هي أزمة انتماء و لا أزمة وطنية و أيه

العيب مش في أسرائيل و الله

العيب فينا و أحنا مصرين نتعامى و نتناسى و نحلف بميت يمين

نحلف بسماها و ترابها و نيلها و أرضها و عرضها و رقصنا يا جدع

و بعد الزفة كله يفك و اللي ليه شوق في حاجة يلحقها

امبارح في القاهرة اليوم قبل ما النيلبة تعلن القضية بيسألوا أم المهندس هو كان بيصلي في الجامع!!!!!

الست كانت بتنكر كأنها تهمة مشينة

أنا اللي مش فاهماه برضه

لما مهندس في هيئة الطاقة المووية يعمل كده و حجته أن البلد مش مقدراه (على أيه داهية تخيب الخايب)..... المهم

لما واحد زيه يعمل كده

خريج التجارة اللي بقاله 5 سنين و يمكن 10 مش لاقي شغل يعمل أيه

خريجي المعاهد المتوسطة و فوق المتوسطة يعملوا

اللي خاطب بقاله 3 أو 4 سنين و مش لاقي تمن الشبكة ما بالك بالشقة و العفش يعمل أيه

قبل القضية كان فيه قضية العطار و برضه السيناريو واحد

واحد رايحلهم و بيقلهم و النبي لتشغلوني جاسوس

مش بقولكم


داهية تخيب الخايب
و يجعله جاسوسية

يا حلاوة الأهلي و هو على المنصة

لولا التعب و العيا اللي انا فيه كنت كتبت للصبح عن الاهلي اللي اثبت انه مش دولة و بس لا و قارة و كوكب كمان

اعذروني لاني بحد تعبانة مع وعد بالكتابة عن الانجاز و الظلم في اول فرصة الحرارة تنزل فيها عن 40

الوزير الخرفان و كلامه الأهبل

من امتى و الأخ فاروق بقى متي مش عارفة

من امتى و هو صاحب رأي يعتد بيه اصلا ...برضه مش عارفة

للأخ فاروق اللي بيقول ان اركان الإسلام 4 و ووفر على الناس واحد(و اهو كله تخيضات و لا موسم البواقي و الفضل)ارحمنا

للأخ فاروق اللي شاي ان شعر البنات بيخليهم زي الورود

للأخ فاروق.....................طظ

فيك و في اللي كان السبب فيك

النادي الأهلي بطل أفريقيا تاني و تالت و رابع و خامس

مش عارفة كالعادة أبدأ منين
من جوزيه الساحر
ولا ابو تريكة الفنان
ولا فلافيو المتحدي
ولا قناوي اللي اثبت لي انه شديد صح
ولا الصفاقسي العنيف المغرور
كانت ليلة من العمر بجد
كانت احلى هدية للغلابة اللي اعصابهم نشفت 92 دقيقة
كانت احلى هدية لحبيبنا كلنا و فقيدنا كلنا عبد الوهاب اللي بأعتبره انه كان اللاعب نمرة 12 في الفريق
ربنا يخليك يا أهلي ياللي وريتنا لمحة نور و فرحة في دنيا ضلمة و كحل

بنات وسط البلد

انا قلت استنى شوية لما الدنيا تهدى كده و الناس تفوق علشان نتكلم في الموضوع ده
ايه اللي بيحصل في بلدنا
كل يوم بتتعرض البنات في بلدنا لمليون نوع اضطهاد
من اول هي ليه اصلا بتطلع من بيتها
السؤال ده انا اتسألته من واحد تعليقا على اللي حصل
"مش لو كانوا قعدوا في بيوتهم ماكانش ده حصل"
قلبنا الضحية لجاني
بدأنا باللي تلبس عريان هي اللي جابته لنفسها
مرورا على اللي مش محجبة هي اللي بتجيبه لنفسها
وصولا للي بتنزل من بيتها هي اللي بتجيبه برضه لنفسها
يااااااااااااااه
كل دول بنات ولاد ستين في سبعين نازلين الشارع علشان يجيبوه لنفسهم
انا عندي حل حلو
احنا اللي يشوف واحدة ماشية في الشارع يضربها بالنار و يخلص البلد من عارها
يا راجل....ما هي اللي جابته لنفسها

تخاريف رياضية

قامت الدنيا و ما قعدتش على جوزيه
الخواجة الاجنبي العميل اللي جاي من بلدهم علشان يشتمنا و يشاور لنا بطول دراعه
يعني لو كان بصباعه كانت هانت
لكن توصل لدراعه كلها
لازم نقطعهاله
يا اخي بلا و كسة
ده مش جهل و بس
لا و هطل كمان
انا هنا مش بدافع عن حركة اي عيل بيشوف مسلسل اجنبي و مش فاهمه و اخره يقرا الترجمة ان كان بيعرف يقرا كان عرف انها معناها القوة ضد الظلم الطاغي
و مش هسرد تاريخ مواقف مماثلة
بس هسأل الأخوة المحموقين قوي قوي قوي
فينكم من اللي بيحصل لاتنين لاعيبة مصريين ضاع مستقبلهم من تحت راس حكم قذر افترى طول 90 دقيقة و ما كفاهوش قرر انه لازم يربيهم علشان يتعلموا يتضربوا على قفاهم و هما ساكتين
هسأل المحموقين عن اتحاد واكل شارب نايم قايم في حضننا و هو اول من بيضربنا في ضهرنا و يرفع تقارير مضروبة للفيفا ضد لاعيبة غلابة و مظلومة
بيرفع تقاريره بالفاكس و احنا اللي بندفع تمن فاكساتهم من جيبنا يا ..............محموقين

مالك يا بلد....يا عيني عليكي يا بلد

مالك يا بلد
سؤال بقي على كل لسان
مع ان العيب مش في البلد
البلد هي البلد
لا زاد فيها دراع و لا نقص منها باع
العيب فينا
ايه اللي حصل لنا يا ولاد بلدي
كل ما ابص الاقينا شابطين في بعض
كل من اختلف كفر التاني
بقت موضة و ماشية في.........البني ادمين
بعد ما كنا كلنا مصريين
بقينا مسلمين و مسيحيين
و كله بيكفر بعضه
ناخدهم واحد واحد
المسلمين بقوا سنة وشيعة
السنة بقوا مليون حاجة في بعض
اللي يقولك سلفي و اللي يقولك وهابي و اللي يقولك اشاعرة و ماتريدية
و كله بيكفر بعضه
الشيعة كمان بقوا مليون حاجة
زيدية و جعفرية و علوية و اثنى عشرية
و كله بيكفر بعضه
حتى المسيحيين هما كمان
كل ملة بقت بتطعن في دين التانية
وكله بيكفر بعضه
الأغرب و الأعجب انه من دقنه و افتله
كلنا بنقطع في بعض
و اللي بره بيتفرجوا و اخر انبساط
ما احنا بنعملهم شغلهم و اجدع منهم كمان
امال...هو مش احنا احسن منهم برضه
يا عيني عليكي يا بلد